mk Logo

തിരുവനന്തപുരം: സംസ്ഥാനത്തെ കനത്ത മഴയെ തുടർന്ന് വയനാട്, കണ്ണൂർ, കാസർകോട് ജില്ലകളിൽ വിദ്യാഭ്യാസ സ്ഥാപനങ്ങൾക്ക് ഇന്ന് (വെള്ളി) അവധി പ്രഖ്യാപിച്ചു. വയനാട് ജില്ലയിൽ, റസിഡൻഷ്യൽ വിദ്യാഭ്യാസ സ്ഥാപനങ്ങൾ ഒഴികെ എല്ലാ സ്കൂളുകൾ, കോളജുകൾ, പ്രഫഷണൽ സ്ഥാപനങ്ങൾ, മതപഠന കേന്ദ്രങ്ങൾ, അങ്കണവാടികൾ, ട്യൂഷൻ സെന്ററുകൾ എന്നിവയ്ക്ക് അവധിയായിരിക്കുമെന്ന് ജില്ലാ കലക്ടർ അറിയിച്ചു. മുൻകൂട്ടി നിശ്ചയിച്ച പരീക്ഷകൾക്ക് അവധി ബാധകമല്ല. കാസർകോട് ജില്ലയിൽ, എല്ലാ വിദ്യാഭ്യാസ സ്ഥാപനങ്ങൾക്കും, ഉൾപ്പെടെ പ്രഫഷണൽ കോളജുകൾ, കേന്ദ്രീയ വിദ്യാലയങ്ങൾ, ട്യൂഷൻ സെന്ററുകൾ, മദ്രസകൾ, സ്പെഷ്യൽ ക്ലാസുകൾ, അങ്കണവാടികൾ എന്നിവയ്‌ക്കും ഇന്ന് അവധിയാണ്. എന്നാൽ, മുമ്പ് നിശ്ചയിച്ച പരീക്ഷകൾക്ക് മാറ്റമില്ലെന്നും കലക്ടർ വ്യക്തമാക്കി. കണ്ണൂർ ജില്ലയിലും, സ്കൂളുകൾ, അങ്കണവാടികൾ, മതപഠന സ്ഥാപനങ്ങൾ, ട്യൂഷൻ സെന്ററുകൾ എന്നിവയ്ക്ക് അവധി പ്രഖ്യാപിച്ചിട്ടുണ്ട്. പരീക്ഷകളുടെ സമയത്ത് മാറ്റമുണ്ടാകില്ല. ഇന്നും സംസ്ഥാനത്ത് അതിതീവ്ര മഴയ്ക്കുള്ള സാധ്യത ഉണ്ടായിരിക്കുന്നതായി കാലാവസ്ഥ വകുപ്പ് മുന്നറിയിപ്പ് നൽകി. കാസർകോട്, കണ്ണൂർ, വയനാട് ജില്ലകളിൽ റെഡ് അലർട്ട് പ്രഖ്യാപിച്ചിട്ടുണ്ട്. തെക്കുകിഴക്കൻ ഉത്തർപ്രദേശ് പ്രദേശത്ത് നിലനിൽക്കുന്ന തീവ്ര ന്യൂനമർദ്ദം മഴയുടെ ശക്തി വർധിപ്പിക്കുന്നതായി കാലാവസ്ഥ വിദഗ്ധർ വ്യക്തമാക്കി. അടുത്ത അഞ്ച് ദിവസത്തേക്ക് സംസ്ഥാനത്ത് വ്യാപകമായി മഴയ്ക്ക് സാധ്യതയുണ്ടെന്നും, ജൂലൈ 19, 20 തീയ്യതികളിൽ അതിതീവ്ര മഴയും, 21-ാം തീയതി വരെ അതിശക്തമായ മഴയ്ക്കും സാധ്യതയുള്ളതായി കേന്ദ്ര കാലാവസ്ഥ വകുപ്പ് അറിയിച്ചു. ഇതോടൊപ്പം, മണിക്കൂറിൽ 40–50 കി.മീ വരെ വേഗതയിൽ കാറ്റ്, ചില പ്രദേശങ്ങളിൽ 60 കി.മീ വരെ ശക്തമായ കാറ്റ്, കേരള തീരത്ത് മത്സ്യബന്ധനത്തിന് വിലക്കുള്ളതായി മുന്നറിയിപ്പിലുണ്ട്.